Náðir þú A-prófinu? Nei, ég er abbadís og flýg aðeins með englum.
Ertu að abbast upp á mig, Aberdínbúa? Nei, ég er abstraktmálari og
vil fá að mála þig með aborralíkama. Er ekki aborri fiskur? Jú. Hann
er dýrategund að auki og sljór að eðlisfari. Hver stendur að baki
þér? Spyrð þú að eigin vild eða hvetur fiskurinn þig til þess? Að
líkindum spyr ég að eilífu. Ég fékk spurningar að erfðum frá englum
á himnum, að fráteknum þeim sem þú flýgur með. Englar á himnum að
frádregnum þeim sem ég flýg með eru að mínu áliti ekki öll himneska
sveitin. Fórst þú að heiman til að sækja arf þinn á himnum? Hvað er
hann annars að gæðum? Góður að hluta. Ég skal segja þér að lokum frá
því hvernig ég fékk arfinn að láni að ofan. Ég fékk hann ekki að
eilífu og verð að lokum að skila við hann á himnum hjá einum engli,
Aðalsteinn að nafni. Hann er hvítur að lit og góður að skapi. Eru
englar góðir að meðaltali? Já, að minnsta kosti að minni skoðun.
Hvernig líta englar út að lögun? Mannlegir að miklum mun en að
nokkru leyti sem guðir, að minnsta kosti að nóttu til. Að mínu áliti
ert þú að tala að óhugsuðu máli. Er svo? Ég skal reyna þá að nýju en
get sjaldan talað vel að óreyndu. Þegar ég sótti arfinn á himnum að
upphafi, spurði ég englana að tölu þeirra og að stærð allrar
himnasveitarinnar og fékk ekkert svar að skilnaði. Að svo stöddu
kann ég lítið í þessum málum að svo miklu leyti sem stærð og tölu
varðar. Spurðir þú englana um tölu og stærð að undirlagi guðs? Nei.
Ég komst bara að utan í himnaríki. Að vísu sá ég engan þar að
tjaldbaki sem átti það að vinnu að reka alheiminn að vild. Varð
ferðin þín þá ekkert að upphæð? Að því er ég framast veit, já. Að
öðru jöfnu fannst mér englar ekki betri en menn, bara ólíkir að
útliti. Himnaríkið lítur út betur að utan, jörð að ofan. Hvað þarf
maður að borga að verðgildi til að flytja vörur að ofan? Að því er
gera má ráð fyrir, ekkert. Það er að öllu samantöldu betra að eiga
heima hér. Nú vil ég borða aborrann og hætta að abbast upp á þig um
engla og A-próf að lokum.