Með þenna flokk ríðr hann austr yfir Fljótsdalsheiði
ok svá fyrir vatnsbotninn ok um þveran háls til Skriðudals
ok upp eptir Skriðudal ok suðr á Øxarheiði til Berufjarðar
ok rétta þingmannaleið á Síðu.
Suðr ór Fljótsdal eru sjautján dagleiðir á Þingvöll.
En eptir þat er hann var á brott riðínn ór heraði,
þá safnar Sámr at sér mönnum.
Fær hann mest til reiðar með sér einhleypinga ok þá,
er hann hafði saman kvatt.
Ferr Sámr ok fær þessum mönnum vápn ok klædi ok vistir.
Sámr snýr aðra leið ór dalnum.
Hann ferr norðr til brúa ok svá yfir brú ok þaðan yfir Möðrudalsheiði,
ok váru í Möðrudal um nótt.
Þaðan riðu þeir til Herðibreiðstungu ok svá fyrir ofan Bláfjöll
ok þadan í Króksdal ok svá suðr á Sand
ok kómu ofan í Sandafell ok þaðan á Þingvöll,
ok var þar Hrafnkell eigi kominn.
Ok fórsk honum því seinna, at hann átti lengri leið.
Sámr tjaldar buð yfir sínum mönnum hvergi nær því,
sem Austfirðingar eru vanir at tjalda,
en nökkuru síðar korn Hrafnkell á þing.
Hann tjaldar buð sína, svá sem hann var vanr,
ok spurði, at Sámr var á þinginu.
Honum þótti þat hloegiligt.